Засгийн газрын хуралдаанаас гарсан шийдвэрийг танилцуулж байна.

ЗГХЭГ-ын дарга Д.Амарбаясгалан:

-Ерөнхий сайд орон нутагт ажиллаж байна. Өнөөдрийн байдлаар нийт 10 аймагт ажилласан, үлдсэн аймагт энэ сардаа очно. Энэ ажлын зорилго бол улсын төсөв аравдугаар сарын 1-нд өргөн баригдахаас өмнө тухайн орон нутагт хийгдэх хөрөнгө оруулалттай холбоотой иргэдийн саналыг авах юм.

Өмнө нь улсын төсвийг аймаг, орон нутгийн удирдлагын зүгээс дэвшүүлсэн саналыг тусгаж ирсэн. Энэ жил иргэдийн амьдралын чанарыг дээшлүүлэх, өрсөлдөх чадварыг дээшлүүлэхэд дэмтэй, тустай гэж үзэн ард иргэдээр өөрсдөөр нь эрэмбэлүүлье гэж байгаа юм. Эрэмбэлсэн байдлаар нь ач холбогдлоор нь үнэлж, улсын төсөвт тусгана.

Одоогоор ажиллаад байгаа 10 аймгийн ард иргэд нэгдүгээрт, дэд бүтцийн асуудлыг нийтлэг тавьж байна. Жишээлбэл, Говь-Алтай аймгийг Завхан аймгийн Улиастай хоттой холбох авто замын төслийг ярилаа.  Энэ мэтчилэн ирэх жилийн улсын төсөвт 800 орчим замын төслийн тусгах ажлыг ярьж байна.

Хоёрдугаарт, очсон аймаг болгоны иргэд дулаан хангамжийг ярьж, үнэхээр тулгамдсан асуудал болоод буйг хэлж байна. Гуравдугаарт, цахилгаан хангамжийн асуудлыг дэвшүүллээ. Энэ нь орон нутагт ажлын байр бий болгох, эдийн засгаа өөрөө бүрдүүлэхэд саад болж байгаа юм. Энэ бүхнийг цогцоор нь шийдэх зорилгоо танилцуулаад явж байна.

Төв аймагт өчигдөр ажиллалаа. Энэ аймагт сургууль, цэцэрлэгийн хүрэлцээгүй асуудал үүсжээ. Тиймээс сургууль, цэцэрлэгийн хөрөнгө оруулалтын асуудлыг нэгдүгээрт авч хэлэлцээч гэдгийг иргэд хэлж байна. Тус аймаг 95 орчим мянган хүн амтай. Хөшигийн хөндийн нисэх онгоцны буудлын бүтээн байгуулалттай холбоотойгоор хүн амын нягтаршил нэмэгдэж байна.

Иргэдийн зүгээс амьжиргааг дэмжих зорилгоор самар түүх, хураах хугацааг сунгаж өгөх хүсэлтийг БОАЖ-ын сайдад тавьсан. Энэ хүсэлтийг Засгийн газрын өнөөдрийн хуралдаанаар хэлэлцэж самар түүх хугацааг нэр сараар сунгаж шийдвэрлэлээ.